المساعد الشخصي الرقمي


مشاهدة النسخة كاملة : ثلاثينيّه ...



الشاعر حمدان المالكي
26-10-2015, 05: PM
ثلاثينيّه ...


احذر تقول الدهر قووول اصحابه
ناسً تبيع الرجـل بالنقديّه

يأخذ ضعيف النفس مال العاجز
لافيه لا رحمه ولا ماويّه

ضمير ميّت ... والحيا ... قد باعه
لعالمً بالقيمه السوقيّه

الطيب ... والمعروف ...ماهم حوله
يدوّرون الغدر والدونيّه

إلى عطاك ... الرجل منهم .. وجهه
كنّه من الفرسان وسط الهيّه

ويوم يبدأ ... السالفه ... عن نفسه
تقول هذا شيخ ماهو عيّه

لو تعرف ... اطباعه .. وسود افعاله
ركزت لك في غاربه شبريّه

بجمس والا ... جيب وارد ... لكزس
وعقال تحته ميّل الطاقيّه

اما خذاها ... ديّن . وإلا ... نصبه
بمظهره واحلامه الورديّه

يوهمك ... بالمستقبل انت .. وربعك
يفتح مشاريعه على البحريّه

والعالم اضحت .... تعتني بالمظهر
ماتعرف المضمون والصدقيّه

يالله دخيلك ... من سواد ... المنظر
يشبه سواد الليله الشتويّه

راع الدراهم ... يرتكز ... بالمجلس
والّي بجنبه كنّهم طرقيّه

وهرجته يضحك ... لها .. حضّاره
يقلون هذا الهرج مافي زيّه

وكل منهم ... لا بتسم له ... يفرح
يقول هذي ليلة القدريّه

لولا قروشه ... كان يعرف .. حاله
يجلس بجنب الباب للرديّه

واما الفقير ... المعدم ... المتهالك
برغم فقره نار جوده حيّه

لامن هرج ... كلاً يقل له .. عجـّل
طولت في هرجك بلا فيديّه

مكسور نفس ... وحالته ... تعبانه
منبوذ حتى من ولده وخيّه

مثل الجمل لا طاح ... زادوا طعنه
بالسيف والسكين والجنبيّه

واما المكابر ... يعتزي .. بالماضي
ماعد بقي في حاضره قاليّه

يحط في الواتس اب .. صوره حلوه
يومه شباب وقذلته مرخيّه

وهو كساه .. الشيب .. وافنى عمره
جلده تطوّى طيةً فوق طيّه

ويذكر الماضي .... يطمّن .... نفسه
ويقول كانت ذي وكانت ذيّه

يجمع صور ... ماضيه جنب اوراقه
يحطها في خزنةً سريّه

وينتقد .... ربعه وكل .... اصحابه
على علومً كلها وهميّه

فاهم ومتعلّم ... وسابق ... عصره
حاصل على تقدير محو اميّه

هياط ياكافي .. بصوت .. وصوره
غرور مدري حالةً نفسيّه

اما عزيز ... النفس راع ... المذهب
إذا نصيته حاجتك مقضيّه

مطلبك لازم .. ينقضي .. من عنده
والا سلف وإلا يكن عاريّه

قول وفعل ... ماله بطول .... الهرجه
مايحسب الروحه معك والجيّه

والخاتمه ... ماني من ... العساسه
مدورين الشمس وإلا الفيّه

استغفر الله ... كان زلت ... نفسي
فيما .. كتبته ... فالثلاثينيّه


شـعـــــــر
حـمـــ المـــالكي ــــدان

المهاوش
26-10-2015, 05: PM
دمت في حفظ الرحمن

المرامحي
26-10-2015, 05: PM
صح لسانك....

طامي
26-10-2015, 05: PM
بالتوفيق...

الهويدي
26-10-2015, 08: PM
جميل جدا....

الخبت
27-10-2015, 11: PM
وفقك الله....

المراسل
29-10-2015, 04: PM
يعطيك العافيه...

ابوذاكر
29-10-2015, 11: PM
صح لسانك اخي حمدان

الناشري
05-11-2015, 09: PM
شكرا على الابداع

الكمالي
07-11-2015, 06: PM
بالتوفيق والى الامام

البهلول
18-11-2015, 01: PM
جميل جدا........