مستوصف القمّه


صادفتها صدفة ابمستوصف القمّه ** بالعين راعيتها لحظه وترعاني

شميت انا عطرها ويابخت من شمّه ** يدوخ ويسكر ولو ما هوب شرباني

قمت أتذكر زمانٍ فات والـمّه ** ولا عاده الله نصيبٍ يوم وداني

هلت دموع العيون ولا بقى همّه ** مما جرالي نسيت الام الاسناني

معها أخوها وضع كفه على فـمّه** كنه يقول الله الستار يا قاني

نفس الملامح ويشبه دمها دمّه ** سبحان ربٍ خلقهم دِعج الاعياني

يدري بحبي وتدري امه وعمِّه ** حال القدر بيننا والحب سلطاني

يبكي ويمسح دموع اعيونه ابكمّه ** يبكي علشانها ويبكي علشاني

والله يالولا الحيا والدين لاضمّه **واسمِّعه شهقةٍ من قلب شفقاني

الحب بلوى ومنه النفس مهتمّه ** وش حيلتي والغضي دمي وشرياني

جسمي يروح ويجي والقلب من يمّه** القلب عنده يبيه ولا يبي ثاني

اقسم بربي وانالي مذهب وذمّه ** لا عيش احبه ولو حبه علي جاني

شربت كاس الهوى وارويت من سمّه ** مامت وارتحت ولا هوب اللي احياني

أضحك مع الناس والاحزان منطمّه ** كني سعيدٍ وانا مبلي بالاحزاني

عندي وصيه وتال الهرج يايمّه ** الموت حقٍ على القاصي مع الداني

وان صرت فوق النعش والناس ملتمّه **مروا على بيتها وتشوف جثماني

قولوا لها الموت زم اصويحبك زمّه ** ما مات حبه ولو هو بالنعش فاني

شلناه للمقبرة وادعيله القمّه ** خوذي ثوابه وجُوديله بالاحساني

يالله ياالمقتدر يا كاشف الغمّه ** تفرح لمن حالته دومٍ بنقصاني

للشاعر:علي سليمان الحميدي . منقول.