يامحمد من بغى عسف الاصايل
الرسن لايفلته من راحتينه

وان مشى ياخوك في وقت القوايل
يحذر اللي يخدع اعقولن ذهينه

لايتبع في سراب وظل مايل
ثم يبلش مايلاقي جيم سينه

ولاتغره غيمتن لوهو يخايل
برقها يشلع ويحسبها معينه

يامحمد ماعلى دنياك زايل
طال عمره او تقصربه سنينه

خذ بدال الحل مجموعة بدايل
واتقى الطوفان لوكان بسفينه

مجلسن مابين قيل وبين قايل
جنبه لوكان قبله للمدينه

واعلم ان العمر يالغالي رحايل
بين مر الحنظله أوحلو تينه

مايجي كل العمر كسب وجزايل
غير حاول أغلبه تجني ثمينه

الكرم رجال والاخوه قبايل
ومن تواضع يرحم الله والدينه

اصعب اديون الرجل رد الجمايل
ياعسى الله يعين من هو كان دينه

القصيده جاتك وفيها رسايل
وانت رجلن مبصر بعقله وعينه

قالها شاعر عشق بدع المثايل
والتحيه نفح ورد وياسمينه

جديدي