تقول : لا تشكي غيابي على الناس
ترى شكواك لغير ربك مذله
واستر على ماشفت ياعذب الإحساس
غصبٍ علي أغيب / أمنتك الله
قلت : أدري إن الحب تاليته إفلاس
بس أسمعي هرجٍ مثبت بأدله
الناس فرق أطباع وأشكال وأجناس
ماني من اللي يشكي فراق خله
أنتي تعرفيني عنيد وقوي بآس
أكتم جروحي لو بي الفين عله
مابحت بأسرار الهوى بكل مجلاس
أموت ما أترك للأنذال زله
أما بخصوص الهجر يابنت لاباس
بصبر وربي يفّرج الهم كله
حتى ولو يعصف بي الهم والياس
ولو أغرق فبحر الحياة الممله
بعيش ولاني خاضعٍ للهوى راس
واللي يبي قربي مكاني يدله
للشاعر : ناصر الرشيدي
