السلام عليكم ورحمة الله وبركاته
نكمل معكم الحلقة الثانية
لم اخذ عوض النتيجه سال ضيف الله هل نجحت قاله ايوه وانت قال عوض نجحت بتقدير ممتاز لاكن خلني باروح أسال عن خلف (خلف هذا صاحب عوض
الروح بالروح واخو حمدة التي بي يتزوجها عوض ) لقي خلف قاله نجت قال لا رسبت في الرياضيات
زعل عوض اكثر من خلف لانه يبيه ينجح حتي يسافرون سوى ومنها يتقرب من حمدة
المهم جاء ضيف الله وهم محزنين وقال وش فيكم ما نجحتم قال عوض اسكت ترى خلف رسب في الرياضيات
قال الله يعينك ما بتروح معنا نتوظف انا وعوض ناظر فيه عوض وقاله من قال انك بتروح معي قال الوالدة
البارحة تسولف للوالد وتقله اذا نجح ضيف الله نرسله يتوظف مع ولد عرفه (عرفه هذي أم عوض )
هنا سكت عوض لان لا محاله سوف يسافر يعني يسافر لان عمه علي ما يقدر يقول لام ضيف الله
ولا كلمه قامو وركبو الوايت ونتعه عوض واشتغل مر على بيت ضيف الله ونزله بعيد عن البيت
ومر بيت خلف ونزله وقاله نتقابل العصر روح عوض البيت وعلى طول على ست الحبايب سلم عليها وعلمها
وباركت له بالنجاح وراح لجدته يعلمها مو لله بس على شان اذا استلمت الضمان تعطيه وحصلها تصلى الضحى
واستناها الى ان خلصت الصلاه وعلمها قالت له خلاص ما دام انك خلصت الدرسة تجي يوم الثلوث توديني
استلم الضمان قال عوض ابشري ان شاء الله انا اصحيك لصلاة الفجر مو موضي العجوز صماء ما تدري وش
يقول عوض رجع عند امه لقيهم يتقهوون موضي ومعيض (اخوه الى بعده ناجح من اول ثانوي شيطان رجيم
مصيبة ويدخن بعد بالدس وعوض يدري عنه بس حيل الله اقوى يخاف منه ) وصالحه (اختهم الصغيره )
وقال لأمه وين جعفر يعني (ابوه) يمزح محد قده ناجح قالت موضي بسرعه راح لشرطه عند سعيد يشتكي
واحد متاخر في الاقساط (مقسط سيارات) هنا ناظر معيض فيها وقالها يعني ما فيه الا سعيد في المركز هو ووجه تقول بقايا
بركان (لان جاه العنقز وترك فيه حفر من اثر الحبوب) قالت امه حرام عليك وعوض يضحك وهي تقوم
موضي وتبكي هنا دخل جعفر (ابو عوض ) قالت ام عوض ترى عوض نجح قال الحمد لله هي روح يامعيض
وجيب ثلاثه تيوس وودها المطبخ خلهم يسوون عشاء اليلة واعزم الجماعة أي واحد تلقاه تقله العشاء عندنا وانت
يعني عوض روح عب مويه لبيت عمك علي هنا غص عوض في بسكت قشطه ابغي يموت قال انا بروح اجيب
التيوس وخل معيض يعبي لعمي قال لا عمك يقول يبغاك وبعد الظهر روح وعب للمطوع (المطوع هنا هو ابو
خلف وحمدة) قام عوض وراح ينتع الوايت بسرعة علشان يعبي للمطوع قبل عمه ويشوف حمدة وابوها في
المسجد المهم وهو يلبق علشان يعبي البركه الا يسمع صوت مبحوح ارجع ارجع الا وهو خلف عرف ان ما فيه
امل يشوف حمدة قعد يسولف هو وخلف الى ان خلصت المويه وراح للمسجد وصلى الظهر وبعد الصلاة راح
يعبي لعمه طلعت زوجت عمه وقالت وينك من اول قال الوايت كان خربان قالت كذاب قبل شوى عبيت لبيت
المطوع المهم عبى وقاله ضيف الله تعال ابوي يبغاك ودخل على عمه قاله الف مبروك على النجاح وترى كلمت
عمك احمد (جندي حاف في خشم العان) في الرياض ويقول ارسلهم وانا اوظفهم في الحرس الوطني عندي
طلع من عند عمه وخلف يقوله متي بنروح علشان اجهز الشنطه ناظر فيه قال اسال امك لان هي التي تقرر
قال خلف طيب عندكم عشاء اليلة شفت المسمار يشيل تيوس (المسمار معيض لانه نحيف جدآ ) قال ايوه وقل
لعمي يجي اليله ويمكن ابوي قاله في المسجد بس تري العشاء لرجال علشان ام ضيف الله ما تجي وراح للبيت
وقاله ابوه وش يبي عمك قال بيرسنا عند عمي احمد في الرياض يوظفنا وانا والله ما ابي اتوظف ابي اكمل في
الجامعة قاله ابوه خلاص شفلك جامعة وسجل فيها
وفي اليل حضرو الجماعة للعشاء وجلسو يسولفون في امور الحياة هذا يتكلم عن خرفة السدر والثاني
يتكلم عن ايام الغابر والثالث ينصح بعدم التعدي على الجار واخر يقول خلونا بكرة نروح نسلم على فلان يقولون
محموم والصغار والشباب يتسمعون الي يفيدهم مو الحين ماغير الاسهم ضيتنا وانا خسرت فيها وما يدرون ان
كل شي بسبب من الله تعالى وولد فلان ما فيه خير كب الوظيفه (وهومسكين قعدوه من الوظيفه بسبب ان عنده
نيميا حاده )
وانا اشتكيت فلان علشان دعس غنمي وينط واحد من اخر الجلسه ويجيب الغايبه قال يقلون عبدالله
(جاره الباب بالباب) منوم في المستشفي واظن ان عنده سرطان وهو ما قام له بزيارة بس يسمع
((تفكك اجتماعي طغى على حياتنا في هذا الزمان وقيام الحسد بكل أنواعه المستعصية على التسامح ))
الله لا يبلانا ..................................................نكمل في الحلقة القادمه
