فمان الله ياحلمي الجميل اللي عشقته حيـل
وضحكني سنين طوال ليـن اليـوم بكانـي
لقاني قلب طفل تغره الجُره بـدرب السيـل
وتبسم لي بلطف وغرني بالحيل وأغراني
وقال العمر فرصه سانحه ماتحتمـل تأجيـل
وانا حلمك ولو ضيّعتنـي ماعـاد تلقانـي
نشدته وين ساري قال طالع للجدي وسهيل
وقلت ابغاك تاخذني وتستعجل على شانـي
وبدينا رحلة الأحلام والخطوه تساوي ميـل
واخذني فوق حتى فوق نجم سهيل ودانـي
وحصلت الثريا في فلكها ساحـره بالحيـل
وشفت نجوم واجد والثريـا شكلهـا ثانـي
خذتني في فلكها لين حتـى مابقابـي حيـل
خذت مني الطفوله والشباب وكل شي فانـي
قضيت العمر كله حلم عشته مع نجوم الليل
ولكني صحيت اليوم مدري ويش صحانـي
وصرت من الذهول ادوّر الجُره بدرب السيل
واراقب للثريا واذرف الدمعه مـن اعيانـي
