عذاب القلوب الحيه
ليش تسأل مايسرك سماع أخباري = لاتقلّب صفحة الماضي المطويه
إحمد الله قلبك الغض ماهو داري = أنت في نعمه وانا النار شبّت فيّه
لاتعذبني سؤالك يزوّد ناري = لاتحاول تنبش أسراري المخفيه
مابقي شي أحتفظ فيه غير أسراري = كل شيٍ راح في سالفة عصريه
السيوف اللي بها كل يوم اماري = مابقي منها شباةٍ تسر يديّه
والبيوت اللي عليها يهب الذاري = من خيوط العنكبوت إثرها مبنيه
والطيوف اللي عليها نظمت أشعاري = معقد الآمال واحلامي الورديه
إختفت عني ورى ليل مابه ساري = غربةٍ ماعاد لي في تعبها نيه
فقت من حلم الكرى وانتهى مشواري = وانت قدّامك دروب الشقا ممشيه
أدري إنك ماتبا تستمع لأشواري = جرّب الطرقه وتلقى بها طرقيه
مير لامن جيتني لاتجر الطاري = لاتذكرني بحاجاتي المنسيه
ربما كلمه تعكر عليّ أفكاري = منت قاصدها وهي في ضميري كيّه
ولو اقول إني لنظرات عينك قاري = ربما فسرت نظراتها العفويه
واعذاب القلب مهما عليه نداري = سيرة الماضي عذاب القلوب الحيه
( منقوله)
رد مع اقتباس
