... أتصنع البسمات والقلب موجوع ...

الصدر ضاق والجفن سد عالي
يحبس وراه أسرار وأحزان ودموع

أجلس مع أخواني وكأني لحالي
أتصنع البسمات والقلب موجوع

وأنا كذا من سبعة أيام حالي
من بعد ذاك اللي هجرته من اسبوع

له أربع سنين وهو راس مالي
ويمشي معي دايم على السمع والطوع

أذكر مواقف بيننا في خيالي
ثم أتبسم وأكتم الدمع واللّوع

مليت من تمثيل دور المثالي
اللي يشوف الشوق والحب ممنوع

ياخوي أنا ماني بــ.[ رجّال آلي .].!
هيكل من الفولاذ والصلب مصنوع

صحيح أكابر لو الأحزان فالي
وأتظاهر الشبعة وأنا ميتٍ جوع

لكن إذا حنيت لإنسان غالي
طبعا بحس بحالة الضيق والروع

تبي الحقيقة عاد؟ ماكنت أبالي
كنت أحسبنه يشبه الغير في النوع

ويوم إن فقدته قلت وش اللي جرالي.؟
وقام الخفوق يوّن وبصوت مسموع

وشفت الليالي غير ذيك الليالي
شفت المجرة لكن البدر منزوع

أحيان أعزز في لقاه إحتمالي
وأحيان أحس إن الأمل صار مقطوع


أتمنى أن تروق لكم وترتقي لمستوى أذواقكم
وسلامة عيون من قرأ ، وتابع..

نقل جميل

نقل جميل