دلعوها؟
قصيدة دلعوها ؟
والارض تفتح صدرها للسما قيض
ويفوح منحرها بعطر الذواري
ويحاول السافي يستّر على الريض
وجهٍ بعين الشمس مخلوق عاري
وتفيض كفين السحابه من الغيض
لعيون بنتٍ دلعوها صحاري
وتعاشر فصول العطش عام وتحيض
بذاك السراب اللي مشقق نهاري
وتجهض بعد عسر المطر غصن حميض
ما يرضع الا من سراب انكساري
ويطلب وصل رحم السحاب المراكيض
وتعق به كم حول ويطيح زاري
ويميل ذابل يبغي يطم بالفيض
والريح تغرف له من الوقت ذاري
وانا مثل طلحٍ جرح خده القيض
واقف واظلل من سنا الشمس جاري
مع ان زمل الوقت فيني مرابيض
لكني ابقى وجهه لكل ساري
وتبي تعرف شلون ياعم بآعيض
احساسك اللي من جفا الشعر هاري
شف جرة يديني على جرهد البيض
حرفٍ رسمني دهشه بعين قاري
للشاعر /محمد بن ساقان,,
رد مع اقتباس
