يافاتنه’’
غصن الغرام إليا تثنى ثم مال
.............يميل معه الليل حتى يتعبه
تعلن عليه الشمس رحله للزوال
............والليل يعلن عن حداده مغربه
يافاتنه والشعر نظم ٍ من خيال
............بنات فكر اللي همومه تشعبه
مادام فيك الشعر ياخذ له مجال
............والله لاصوغه فيك وأجيب اعذبه
محال أقسى لو قست سود الليال
.............محال اقول ان اعذب الشعر اكذبه
ياسلسبيل الروح ياروح الزلال
..............ياراس مال اللي غلاكم مكسبه
لاجلك تساق الروح ويساق الريال
..............وفيك المثل لاقيل يصدق مضربه
أنتي حمامة سلم لاشح الوصال
...............ياشمعدان الحب نارك تذهبه
ياعين حر ٍ في طويلات الجبال
.............. يجزم لو إيدين الهواوي تقضبه
ياعنق ريم ٍ في خبيب الريم جال
.............صوت الهوى لاهب شاش ويرهبه
ياحظ من جيتي بدربه طيب فال
...............وياطيب فال اللي سنينك تقربه
روض الغلا من مزنة العشاق سال
...............شوف الخزامى فالمحاني معشبه
حنت خلوج العشق بعد الليل طال
.............واللول من عين الشقاوي يسكبه
تضيق فيه الارض لو فيها مجال
............. في داخله صرخة يتيم ٍ مرعبه
عنها ندس الراس في وسط الرمال
.............واللي تـبـي سود الليالي تكتبه
سؤال يطرح والاجابه في سؤال
.............الى متى غبر الليالي متعبه
لكن ابشكيها على عال الجلال
............ماخاب عبد ٍ يم ربه مطلبه
النااايف
رد مع اقتباس
