التناكر .. بين خلق الله بــدى
التـنـاكر بين خـلـق الله بدا
صار هذا تـقـل مايعرف هذاك
الفـتـن خلـت رفاقتنا عـداء
والوجيه البيض تطعن في قفاك
استمع صوتي ولا ابيلك صدى
داخرن ياذيـب للمرقب عواك
بح صوت العقل من طول الندى
المس المحسوس واستخدم ذكاك
فرصة التغيير لا تذهب سدى
قبل تبدا خطوتين إرجع وراك
طيبتك مع بعض خلق الله ردى
لا تواضع وأسفل العالم رقاك
الحقيقة زيـف والمصلح غدى
والنصيحه أوشكت تصبح هلاك
لا تقول إن مالي ومالك جدى
يا عزيز النفس ماينفع غناك
وش عشاك وأنت ماتلقى غدا
لا تقول إن الغداء تالي عشاك
أدري إن العافية ثـوب و رداء
لكن الخوف المرض إليا اعتراك
للطموح إن مات واحدنا فدا
البلاء لا عشت ماحيٍ رجاك
للعطش غيمة وللوردة نـدى
والوسيلة قـد تبـرر مبتغاك
إنحــلال المجتمع ماله مدى
ناظر أصحابك قبل تنظر عداك
الفسـاد بدورنا قـام يـحـدى
أضعف الإيمان تسأل وش بلاك
النـبـي بـدّل ضلالتنا هدى
بس ما يقدر إذا ما الله هداك
رد مع اقتباس
