الرفقه...
حتى أنت....؟ بانت نواياك وتصاغرتك
وانا اللي أبروز علومك واكبرها
خاويتني وانتهض راسي وناصرتك
وهزيت لأسمك هل الطيب ومنابرها
ونقلت حملك على متني وسايرتك
وخاويت بك نقوة العربان واخيرها
وعلمتك بقيمة الرفقه وصقرتك
وازريت اغطي عذاريبك وتضهرها
أستصغروك أقرب اصحابك وكبرتك
وصغرتها لين خليتك تصاغرها
أمد يميني ليمينك يوم قدرتك
وتردها من ردا راسك وتقصرها
والله ما أنت بمثل ما أنا تصورتك
تلد عينك على العوجا وتسبرها
ما أخترت أخاويك من رغبه ولا أخترتك
خسارة اسنين عمري فيك وأشهرها
غلطان لو تحسب ان الأجواد خاسرتك
بالعكس من تفقدك ما الله مخسرها
عاشرت غيرك على الدنيا وعاشرتك
ولا أنت أول اللي فقدت وجعلك آخرها
أحرقت كرت الصداقه وأحترق كرتك
تسعه قضوا من حياتي وأنت عاشرها
ان ما حقرت العرب ما هيب حاقرتك
ولا يمكن تعز شانك وأنت حاقرها
علمتك العام وقبل العام حذرتك
أستر عيوبك مدام الله ساترها
غرورك يسوقك لبيبان مقبرتك
وتواضعك يرقب العليا و (يضهرها)
لو ما تغير طباع النفس غيرتك
وتواضع الناس يغني من تكبرها
ثلاث تتجر بها ماهي مخسرتك
تجارة" ما تخيب ظن تاجرها
نباك وأسمك ورجوا الله مغفرتك
نصرا" من الله كان الله سخرها
لا ترضي إعداك وتكسب من تحاقرتك
ولا تزعل أقرب بني عمك وتخسرها
وأقد على الطيب ما رجلك معثرتك
واتعب على رفقة الطيب ودورها
ولا تذخر بوقفتك والناس ذاخرتك
أن كان فيها (مغز أبره) لا تذخرها
ترا ثياب الردا ماهيب ساترتك
ونقد الرياجيل يوجع وانت خابرها
لو تطلب الناس منك فوق مقدرتك
أما تحزم لها والا تعذرها
ولا تعتذر من رخى ماهيب عاذرتك
ولا تقول ما اقدر عليها وانت قادرها
طعني ولا عاد تطغى في مكابرتك
لا تموت الأنفس قبل تصحى ضمايرها
حاول في دنياك تعمل شي لأخرتك
ما عقب طول العمار الا مقابرها
مما راق ليـــــــــــ،،
رد مع اقتباس
المشاركة الأصلية كتبت بواسطة البرضاوي
