ياقــلب .. يالي ورثك جروح والام
عقبال ياماخذ فؤادي مية عام
ضيعتني منك وانا ما اهتديتك
لا مانسيتك كيف بنساك مادام
ذكرى الفراق تهزني لو نسيتك
حبك قدر وانا على دين الاسلام
مكتوب في وجه الجبين ورضيتك
ولك منزلٍ في نايف القلب وخيام
وذود الغلا ترعاه ولاشكيتك
يفطر عليك القلب وان فارقك صام
والله لو انك شوك سدرة كليتك
القلب طيرٍ لادعى للهواء حام
والا انت وكره من كثر ماهويتك
كن العيون من النظر عقبك ايتام
وكني ماريت الا انت من يوم ريتك
وكنك معي وانا فقدتك من اعوام
مع الخيال القاك كني لقيتك
ومن صعب وصلك ماتهنيتك احلام
لاجابتك فزيت شوق ومحيتك
يعني وصالك صعب واهدافي اوهام
يعني زرعتك للقدر ماجنيتك
صبرك يقولون العرب كل الايام
يومٍ عليك ويوم لاجاك جيتك
وياقلب ياللي ورثك جروح والآم
بليتني ماهو أنا اللي بليتك
ولعتني من عادني بالهواء خام
واسرفت بي وانا اخطأ منك عطيتك
طعتك وزبدة طاعتك هم وهيام
مالله كتب لي واستخرت وعصيتك!
لو للقلوب اسواق بايع وسوام
لا ابدلك وان جيتني ماشريتك
والا انت ياللي جيش عينيك مقدام
لا اقنعت منك والرجاء مارجيتك
كني سجين بين افراج واعدام
وكنك سجن وانا بنفسي بنيتك
وعقب الوصال اللي على عين مالام
قد هو يكفيني عن الوصل صيتك
وقدني اذامريت بالشارع العام
لديت مما في الضمير ودعيتك
ادري ان صوتي ماقطع عشرة اقدام
وادري بي اعود الى من نصيتك
ياشينها يا محني راس الابهام
مقدر على شوفك وانا عند بيتك
للشاعر // إبن فطيس
رد مع اقتباس
