( غريب ) من بعدك بلا أوطان
محتاج لك , وأرهقني التفكير !
شبعانة أحلامي من الخذلان ,
لذلك أتشاءم من ( التغيير )
الحلم ( طير ) وحظّي الجنحان
ودَّه يطير .. وما يعرف يطير!
علَّمتني وشْ لهجة الكتمان
شاعر ولكن سيِّء التعبير!
خلَّيتني عطشان ( للنسيان )
آبرتوي .. لكنّ ماش البير ,
بنساك ! بسْ مسكَّرة البيبان
مبرمجة الذكرى على التذكير!
صوتي , ثيابي , خطوة السكران
فقير لكن في الشعور آمير
أرخصت هالعالم عشان إنسان
لكنه أرخصني عشان الغير
شكراً ل ( روحي ) عشت حتَّى الآن
وإلى التعب مع صادق التحقير!
يا قبري المظلم ويا الأكفان ,
ضمُّوني , وعذراً على التأخير!
كذاب أنا لو قلت لك ولهان
عديت مرحلة الوله بكثير
من كثر ماني للوصل شفقان
أبكي وأدور للبكي تبرير
تصور إنك صرت لي عنوان
مهما كتبتك أشعر بتقصير
مدري متى ما أقول كلمة كان
ومدري متى بستوعب التطوير
قلبي وفا لقلبك وقلبك خان
هذا جميلك ؟ عيب منت صغير !
بأول عناوينك شبعت أحزان
شلون بوصل للفصل الآخير
جيتك بعد شكيت بالإيمان
وآمنت بإن شعورنا تزوير
في غيبتك ما في الحياة ألوان ,
شعبك فنا , وما للوطن تحرير!
عاجز وجرحي ينزف وخجلان ,
والعذر كاسر خاطر التبرير!
شلون عدَّانا شهر ( شعبان )
وما قلت لي : كل عام وأنت بخير!

وسلامتكم ..

الشاعر محمد احمد الحربي