وجهة نظر شاعر
على حسب مامرني ومن تجارب الاولين
وجهة نظر ويجوز فيها الاتفاق والانقسام
الاوله اترك مسافه كافيه بينك وبين الاخرين
بعض البشر ودك حدود المعرفه معهم سلام
والثانيه اصمت ولاتحرص على كثرالكلام الصمت زين
اللي سكوته ساتره يمكن يعريه الكلام
والثالثه واذا تكلمت احذر تكون اطول المتكلمين
السالفه لاطولت يضعف معاها الاهتمام
والرابعه وامزح ومزحٍ باللسان اخير من مزح اليدين
مزح الرجال العاقله على حدود الاحترام
والخامسة واضحك ولاتضحك برفع الصوت رفع الصوت شين
من الادب والذوق عند الضحك ضحكٍ بإبتسام
والسادسة واكرم وبيبان الكرم واجد ولا يحتاج دين
وترى الرجال إكرامها ماهوب في كثر الطعام
والسابعة واحلم ولا تعجل ولا تغضب ولا تشري بدين
وشاور ولو رايك معك لا شرت عداك الملام
والثامنه واذا شريت بدين لاتبطي على المتجملين
كلٍ حلاله غاليٍ عنده لو انه مايسام
والتاسعة ولاجاك مديونك معه بعض الوفى وبعضه لحين
فأستد باللي جاك وشدراك لله الدوام
والعاشرة وترى التغافل فيه لذه وانشد المتغافلين
وان جات كلمه توجع اطلقها مع سرب الحمام
و 11 وارضى ليا جاك الرضى لو العذر ماهو سمين
وترى التسامح ميزة الساده رفيعين المقام
و 12 وصادق واذا صادقت ماجربت ماصادقت لين
اما يطول بك السهر والا يطيب لك المنام
و 13 واصدق مع نفسك وتلقى نفسك من الصادقين
والنفس خيل ابليس لاتعطيه نفسك واللجام
و 14 وليانصحت انصح خفى لاتفضحه فالحاضرين
ترى الرجال يقودها لين الحكي قود الخطام
و 15 ولا اتواضع في حضور العالم المتكبرين
تكلم بنفس الطريقه معهم ونفس النظام
و 16 واخلاقك وتواضعك عامل بها المتواضعين
ونصف الادب مجامله جامل ولاتجامل لئام
و 17 واذا تسولف عن طموحاتك مع المتفرغين
كنك تسولف للنصارى فالحلال و فالحرام
و 18 والعمر ماهو فرصةٍ وحده ولاهو بفرصتين
مع كل مطلع شمس لك فرصه وخطوه للامام
والأخيرة هذا ولازلنا تعلمنا الليالي والسنين
والعلم اخير من الجهل والنور جلاي الظلام
رد مع اقتباس
