----- البدع لاعلم من شاعرها

*****
ثنتين عنهن ما تجوز المعاذير
سترك لاهل بيتك ومكسب يمينك

وثنتين لو طال الزمن ما بهن خير
هرج القفا ومجاملة من يهينك

وثنتين يطلقن الوجيه المسافير
ترديد ترحيبك وضحكة جبينك

وثنتين يسوون التعب والمشاوير
مواصل ارحامك وفزعة قرينك

وثنتين نار وعار معنى وتفسير
ترضى الخنا وتخون مستأمنينك

وثنتين لا تقبل بهن الاشاوير
الجار والصاحب ليا قال وينك

وثنتين يشرن بالذهب والدنانير
حشمة بني عمك ونصرة عوينك

وثنتين جنبهن واحذرك تحذير
فعلٍ يشنّع بك وهرجٍ يدينك
===================
----- الرد لــ حمدان المالكي

*****
الاوله واجب ومن غير تقصير
من صغر سنك لين تبلغ حنينك

والثانيه يالله يارازق الطير
يكفيك هرجة ناس هم حاسدينك

والثالثه ضيفاً لفا حزة عصّير
اكرم سباله وابشر الله يعينك

والرابعه مالك ومايعمل الغير
اكسب رضاربك بتالي سنينك

والخامسه بتصور العقل تصوير
ياكبرها لا وقعت في جبينك
l
والسادسه به ناس مثل العصافير
يطير لامن حس طاري ونينك

والسابعه ماعاد في قربتك خير
منزوع حتى من مشاعر ضنينك

والثامنه ماهي بحاجة تقارير
تشخيصها واضح وقدام عينك