العطله اللي كل ابوها تكاليف،،
مثل البحر غدار جزره ومده؛؛؛

تستنزف جيوب المساكين ياخليف،،
واللي جمع قرشين صيفه يهده؛؛؛

مسكين ياللي ودك تروح لجنيف،،
لاتفتكر مصيافها مثل جده؛؛؛

جنيف تبغى منك جملة مصاريف،،
تذاكر وفندق وحاجات عده؛؛؛

مره تبي ع البحر ومره تبي الريف،،
وتكسي على حسابك ميه ماتسده؛؛؛

وامنها ياخليف حده كما السيف،،
يعامل المسلم بقسوه وشده؛؛؛

توجه على ابها عروس المصاييف،،
ولا هدا الطايف على جنيف بده؛؛؛

الديره اللي زينها والتواصيف،،
تحضن كفوف الزين وتبوس خده؛؛؛

في مهرجان الورد تسمع غطاريف،،
وللمنظر الخلاب شوفك تمده؛؛؛

وعلى غدير البنت جنب النفانيف،،
اجمع حطب للنار والفرش مده؛؛؛

وبهر الدله وعدل بها الكيف،،
وخذ ساعة(ن)تنسى بها كل شده؛؛؛

والسوده اللي تعانق الغيم ياخليف،،
مصياف كل اللي ظروفه تحده؛؛؛

وتنسي هموم اللي همومه مراديف،،
وتجلي غموم اللي غمومه تهده؛؛؛

هذي علومي ياعرب دون تكليف،،
ومن ما بغى علمي عليه يرده؛؛؛