من اختياري
الفن الفت الحزن غصبن عليه
ثم لافني لوفن وروحي شقيه
كني يتيمن في نهار الضحيه
ومالي على الأقدار يازين حيله
والبا برى حالي من الوقت باري
وماني على التطنيش يازين ضاري
ومفارق الخلان مخلف مساري
والدمع ماهو شرط عيني تسيله
والتا تعاود خافقي الف عله
ومعذور منهو فارق ابيوم خله
اللي بوسط الروح ماكن محله
وشلون اقبل فالمحبه بديله
والثا ثلم قلبي فراقك ولكن
ماعاد لي ياغير اصبر لو اون
يمكن يجيلك يوم يالغالي تحن
وتقبل علي وهم قلبي تزيله
والجيم جاوب ياوليفي خطابي
وارحم خفوقي من عظيم العذابي
وانته حبيب الروح مشفى مصابي
تكفى يدينك لاتطول بخيله
والحا حياتي ياحياتي بقربك
تعال وازرع من يودك بتربك
واعف اللذي يغليك يازين حربك
يالصاحب اللي مالقينا مثيله
والخا خلاص اليوم ماعاد بي حيل
الهجر كله ياوليفي تهاويل
متى تجيني يكفي القلب تنكيل
الشوق يصهل في خفوقي بخيله
والدا دوايه نظرتن من عيونك
ياواحدن بالغيد مافيه لونك
انشهد ان الغيد يازين دونك
وحدك زعيم الحسن وحدك وكيله
والذا ذنوبك في حياتك فراقي
وانا معك بالحب يازين راقي
حملت لجلك كل مالايطاقي
ومثلك بوسط القلب دايم مقيله
والرا رتيب الحال من دون لاماك
ياصاح عن درب الوفا ويش اعماك
وش صالحك في كل لحظاتي اضماك
ماهو كذا فعل الخليل فخليله
والزا زرعت الروح في ديرة البعد
وفي ذمتك لي عهد ياعمري وعد
ماغير بارق يالغضي زايدن رعد
ولا المطر ماترجم اللي اخيله
والسين سم الحال ياصاحبي سم
غيبتك ياللي كنت منك انتظر سم
متى على الله يالغضي يوم ترسم
ملامحن للوصل حلوه جميله
والشين شانت ياوليفي علومي
والناس صارت تجتهد دوم لومي
وافرح عدايه يوم شافوا ثلومي
كثرت بروحي والسوالف مطيله
والصا صرفت الحرف ناداك وينك
على أمل تحضن يديني يدينك
واصير لك اقرب من رموش عينك
ونحيا بليلن خير من الف ليله
والضا ضوى بالروح للشوق نيران
والضيم ياسيد الغنادير عنوان
للي غدى في مجمل الحال حيران
ياغايتي لجلك عجزت الوسيله
والطا طفا نور الفرح والمسره
حسيبك الله كيف قلبي تجره
ياصاحبي بالهجر ثمن تضره
وهو يتحرى جيتك يااصيله
والظا ظلام الهجر حل بحياتي
وقرب على ماظن بعدك مماتي
وان مت تعرف ياوليفي وصاتي
جسمي لحد يازين غيرك يشيله
والعين عود عل روحي تعيد
ياللي غرامك في خفوقي مشيد
ويامن على كامل حشايه تسيد
كانك على درب الهوى دون ميله
والغين غيم الياس بالروح حلت
والروح يالمجمول والله ملت
انكان فرقايه بقلبك تعلت
منهو يودك ليت تخلي سبيله
والفا فريت الصدر عافاك ربي
قول الصحيح ان كان قد عفت حبي
وانا على الله أمر جرحي وطبي
لوكان حبك رغبتي سلسبيله
والقاف قرر في ودادك مصيري
مودتي يازين تصبح نصيري
لو كان يجمعنا فراش الحصيري
معاك أجمل يالغضي من خميله
والكاف كمل بعدك اليوم صبري
دموع عيني تمحي اليوم حبري
والهم يسكن ياوليفي بصدري
والروح في فرقاك جدن عليله
واللام مفتونك ترى وصل حده
ليامتى يازين وانته تصده
راجيك حبل الوصل يازين مده
جيتك تشفي قلب زايد غليله
والميم موتي والحياه بشفاتك
يانادرن بالغيد والزين ذاتك
تعجز حروفي ماتوصف صفاتك
يامن تمنيتك لروحي حليله
والنون نلت القلب ياناعم العود
خدين ورد وتين لو بوصف نهود
والخصر ماعدا دبل شبر بالزود
اجعد شعر وعيون تسحركحيله
والها هديتك الحروف الصريحه
تدعيك تعفي صاحبك من مطيحه
لامك دوى يازين روحن جريحه
لاشك من فرقاك هذا حصيله
والواو وصلك ياغناتي غناتي
عيني مناها يوم ياصاح تاتي
تجمع حبيب الروح بيدك شتاتي
ياسابقن بالزين ترفات جيله
واليا يموت العشق لا طول الصد
جتك حروفي وانتظر منك الرد
عجل علي الحال ياصاح منهد
مالي على فرقاك يازين حيله
رد مع اقتباس
