نزعل ونتكبّـر وحنا من الطيـن.
والكل منا صــــدّ لا أقبل خويّــه.!!

نفخـر نقـول إنا على الصد قاوين.
وهـيّ علينا في الحقيقــة قـويه!!

نشفـق على الطـيبة و كسب الكريميـن.
وهذي بنا لاشك فعـلة رديـه!!

نـنسى نهـايتنا وعلى ويــن ماشيـن.
وننسى الزمان اللي جمعنا سـويه!!

المشكـله ماهي بـ حـاجة لــتخمين.
ولاهي بعد ياخلق صعبـــة القضيــه!!

دق الرقـم كيفـــك هـلا فيك وأهليـن.
أنـا الخـوي اللـي مـزعّـل خويــه.!!

قلـه تغيب وصورتك داخل العين.
ويبقـى لـ حبك في خفـوقي بقيـه!!

أخوان حنا لو يجي بيننا شيــن.
وما نفترق دام المحبـة. نديــــه!!

خلك قـوي لاتحتـكرك الشياطين.
قبل الفوات وقبل وقت المنيـه!!

كلّم خويك بــ اطيب الهرج واللين.
وأعرف جميل القول يمسـح رديــه!!

هذي هي الدنيا من الحين لـ الحين.
لابد بين الناس تحصـل خطيــه!!

ومن لايقدّر غلطـة أحبابه الحيـن.
يقــرأ حـروفي ويعتبرها هـديه!!

باكر تمر سنين وسنين وسنيـن.
والـكل يرحـل في الدروب المـديـه!!

صدقني تندم وأذكر حروفنا زين.
تندم على خلك إذا غاب ضيّــه!!

دنيا غريبـة وأكثر الناس ماشين.
وكم صـاحبٍ والله دفنته بــ يديـه!!

منقول