اطلق معاناتك مع الطير لاحام
وخلك على ماقيل راعي طويلة

واصبر على جور اليالي والايام
راع الصبر لابد يلقى الحصيلة

ولا تشتكي للناس لوكنت منظام
شكوى لغير الله ياهي ذليلة

وان كان بحر الياس هايج ولطام
خلك سفينة نوح قد المهيله

يعجبني الرجال لا صار مقدام
صكات بقعا ما لقت فيه حيله

حتى لو ان الحظ طايح ولا قام
ما طاح مع حظة ولا فيه ميلة

ما ميلت به سود الايام ما دام
رب البشر والكون دايم وكيله

هذا الخوي اللي على مر الاعوام
حطه على يمناك سيفٍ تشيله

وليدالحربي
ابومازن

يامهندس ابيات القصايد يالالهام
يامقتنص بكر المهار الاصيله

رجلٍ خذا صبره مطيه لقدام
يبشر بسعده دام صبره دليله

كم واحدٍ عانى من شطون والام
وطوح بها في بير حزة مقيله

قدام وجه اللاش رز التبسام
لو داخله للحزن شبت فتيله

وان بث حزنه مايبثه للاقزام
الا لرجلٍ منه يلقا الجزيله

جنب عن اللي همها نسج الافلام
مانام عنهم في مساريه ليله

هذا الخوي اللي مثل راسك حزام
لو مال وقته خير ماهد حيله

واللي جداها تسمح الدمع باكمام
حاشاك ماهي طامعه فالجميله

محمد الراجحي
ابوشامي